ILOILO CITY- Ginkontra sang isa ka eksperto ang pahayag ni Presidente Rodrigo Duterte nga dapat basulon ang mga squatters ukon informal settlers sa nagakatabo nga deforestation nga kabangdanan sang lapnagon nga mga pagbaha ilabi na sa Luzon.
Sa interview sang Bombo Radyo kay Dr. Jean Talens, training officer sang Climate Change Network for Community Based Initiative, iya ginpahayag nga ang matuod nga may sala amo ang dalagko nga mga logging projects kag mga bigtime nga mining concessions.
Suno sa iya, mangin ang mga basura nga makit-an nga nagatuga sang pagbara kag pagbaha ang iya man sang mga dalagko nga mga kompaniya kag ini nga mga produkto ang indi man gani masarangan nga baklon sang mga pigado kag mga squatters.
Gindugang man niya mangin ang mga magagmay nga quarrying activities, smalltime illegal logging kag gagmay nga mga minahan nga nagaserbi lang nga livelihood efforts sang mga pigado ang indi man mahimo nga mabasol.
Gin-ako man niya may mga individual practices nga dapat bag-uhon apang kinahanglan gid nga kontrolon ang dalagko nga operasyon sang mga higante nga mga kompaniya nga amo gid ang nagahalit sa palibot.
Matandaan nga ginpahayag ni Presidente Duterte nga ang mga squatters amo ang nagapang-utod sang mga kahoy ilabi na sa mga kaumahan agud magpatindog sang balay bangud indi sila makasarang magpatukod sang konkreto nga puluy-an.
