ILOILO CITY- Ginakwestiyon sang mga cockpit operators kag promoters sa Iloilo ang indi patas nga pagsulundan nga ginapatuman sang gobyerno sa pagpatigayon sang livestreaming sa bulang.
Sa interview sang Bombo Radyo kay Engr. Alex Bucol, cockpit operator kag promoter, iya ginpahayag nga sa iban nga lugar kaangay sang Cebu, Ilocos, Cavite kag Laguna, ginatugutan ang pagpatigayon sang livestreaming apang ginadumilian naman ini sa Iloilo.
Suno sa iya, kuntani patas nga oportunidad ang ihatag sa ila ilabi na nga ginakabig nga lifeline sang bulang ang livestreaming.
Ginpahayag naman niya nga magapasa sila sang position letter kay Iloilo Governor Arthur Defensor Jr. agud hingyuon nga pasugtan ang livestreaming sang ginapatigayon nga bulang.
Nahibaluan nga sa memorandum order sang Department of the Interior and Local Government kag resolution sng Inter-Agency Task Force, ginadumilian ang telecasting sang nasambit nga aktibidad.
