Imposible na nga mag-updanay sanday Presidente Rodrigo Duterte kag Vice President Leni Robredo sa pagtrabaho.
Ini matapos ang pagpakamalaot ni Presidente Duterte kay Robredo sang tinalikdan nga adlaw sa diin gin-akusaran sini ang bise presidente nga amo ang nanguna sa pagresponde agud nga i-discredit ang presidente samtang may yara sang kalamidad — kag ini naman ang ginpanginwala ni Robredo.
Suno kay Presidential Spokesman Atty. Harry Roque, indi na mahimo pa nga mag-updanay sila bangud duha na ka beses ginhatagan sang Presidente si Vice President Robredo sang kahigayunan.
Kag apisar sang duha ka mga oportunidad pahayag ni Roque, mas ginpili sang bise presidente nga pamatian ang iya mga advisers kag nagdesisyon nga mangin opposition.
Nahibaluan nga nangin housing chief si Robredo sa sulod sang lima ka bulan kag naghalin sa pwesto sang Disyembre 2016 matapos gin-ban siya sang presidente nga mag upod sa mga Cabinet meetings.
Nag-issue sang statement ang bise presidente matapos naghalin bilang housing chief sa diin iya ginpahayag nga kritikal para sa iya ang mga polisa sang administrasyon lakip na diri ang pagpalubong kay the late President Ferdinand Marcos sa Libingan ng mga Bayani.
Nagserbe man si Robredo bilang co-chairperson sang Inter-Agency Committee on Anti-Illegal Drugs sa sulod lang sang tatlo ka semana matapos nga ginsipa sa pwesto sang presidente bangud sa pagpakig-istorya sini sa mga foreign entities.
Dugang pa ni Roque, ang duha ka mga appointments sa bise presidente ang wala nangin madinalag-on kag diri nagapakita nga indi na kinahanglan pa sang administrasyon nga i-appoint liwat si Robredo.
