Magahingyo ang Kamara nga pasakaan ang calamity fund para sa tuig 2021 nga indi magnubo sa P5 billion sa diin ini ang gamiton sa pagkaayo sang mga lugar nga nagguba bangud sa mga bagyo sang damlag lang.
Suno kay House Speaker Lord Allan Velasco, iduso niya sa bicameral conference sang 2021 national budget ang pagpataas man sang calamity fund.
Maga-updanay ang duha ka mga sangay sa tion nga maaprubahan na sang Senado ang version sang proposed budget.
Bangud sa mga mabaskog nga bagyo nga nagsulod sa pungsod, kinahanglan nga buligan ang mga tawo nga makabangon liwat ilabi na ang ila tagsa ka mga komunidad.
Base sa reports sang mga ahensya sang gobyerno, ang kabug-usan nga halit tuga sang tatlo ka mga bagyo sa imprastraktura kag agrikultura ang naglab-ot sa P35 billion.
Santu naman sa pondo nga ginpasa ni Presidente Rodrigo Duterte sa Kongreso sang Agosto, ang calamity fund para sa 2021 ang yara sa P20 billion sa diin ang P5 billion sini amo ang pondo para sa Marawi reconstruction kag ang P6.25 billion ang para sa quick response funds sang anom ka mga ahensya.
Sa P6.25 billion, P2 billion ang para sa Department of Education, P1.25 billion sa Department of Social Welfare and Development, P1 billion sa Department of Agriculture, P1 billion sa Department of Public Works and Highways, P500 million sa Department of Health, kag P500 million sa Department of National Defense-Office of Civil Defense.
Ang nabilin nga P8.75 billion amo ang natalana para sa mga biktima sang kalamidad kag indi ini bastante pahayag ni Velasco sa pagpakaayo sang Bicol nga amo ang tuman nga nahalitan sang bagyo Rolly.
Nahibaluan nga ginpaidalom ni Presidente Duterte ang Luzon sa state of calamity bangud sa sunod-sunod nga bagyo nga nagtuga sang malala nga pagbaha kag nagbilin sang madamo nga napatay.
