ILOILO CITY – Ginkumpirma sang pamunuan sang Iloilo City Police Office nga gang ang involved sa kinagamo sa Sunburst Park JM Basa St., kag Plaza Libertad Iloilo City Proper.
Sa exclusive interview sang Bombo Radyo kay Police Captain Marlyn Roquero, pinuno sang Women and Children Protection Desk sang Iloilo City Police Office, iya ginpahayag nga sperm junior gang ang involved sa rambol kag binun-anay sa nasambit nga lugar.
Suno kay Roquero, iya ipatawag ang mga miyembro sang nasambit nga gang agud masolbar ang problema.
Pahayag ni Roquero may yara naman sang “Project B.O.N.G” ukon Bringing Order to the Nemesis of Gang sa diin may ginalunsyar sila nga aktibidad kag seminar agud mabuligan ang mga menor de edad kag matutukan ang peace and order.
Matandaan nga liwat nga nangin sentro sang mga balita sa syudad ang youth-gang related incidents sang nagligad nga semana matapos ang sundanay nga rambol sa Iloilo City Proper sa diin apat ang nabun-an.
