ILOILO – Padayon ang pag-imbestiga sang Philippine National Police sa mga service firearm sang kapulisan.
Sa interview sang Bombo Radyo kay Police Lt. Col. Joem Malong, spokesperson sang Police Regional Office 6, iya ginpahayag nga kun magpatigayon sang accounting sang inspeksyon ang Philippine National Police sa mga service firearm, wala ini gina-anunsyo agud matukiban sang mga police commander ang ila personnel nga wala sang armas.
Suno kay Malong, sa nasambit nga inspeksyon, may yara na nga daan sang mga rekord ang firearm sa diin makit-an kun nadula ini ukon ginprenda.
Pahayag ni Malong, kun matuod nga nadula ang isa ka firearm, gilayon ini nga ginapablotter kag ginapasa sa investigation board nga amo ang responsable sa pagtukib kun sa diin ang armas.
Dugang pa sang natungdan, kun ginprenda naman kag may negligence sa police personnel sa iya firearm, makabig ini nga malversation of public property kag grave misconduct.
Matandaan nga ini ang may kaangtanan sa natabo ang krimen nga pagluthang-patay sang Chinese Businessman nga si Willy Sy sangNobyembre 12 sa sa Iznart Street, Iloilo City Proper sa diin ang suspek amo sanday Andy Mahinay alias Hapon, 38, residente sang Barangay Nonoy, Iloilo City Proper kag ang iya 16-anyos nga ihado nga si Alias Jan-jan.
Nahibaluan nga service firearm ni Police Corporal Val Allan Lisay, myembro sang Mandirigmang Mang-aawit sang Police Regional Office VI, ang ginatudlo nga gingamit sa pagpatay sa biktima.
Pagkasunod nga adlaw, ginsungka ni Police Corporal Lisay ang iya service firearm sa Campo Delgado.
Gilayon nga ginpaidalom sa restrictive custody si Lisay samtang ginahulat naman ang resulta sang cross-matching kag ballistic examination sa recovered empty fired cartridge nga ginpasa sa crime laboratory.
Kun mapamatud-an ang sala, kaso kriminal ang ipasaka bangud accomplice ukon kahimbon si Lisay sa krimen kag kaso administratibo ang ipasaka ang kaso nga malversation of public property kag grave misconduct.
