ILOILO CITY – Ginkumpirma sang barangay officials sang Wilson, Jalandoni, Iloilo City Proper nga sa ila lugar nagaistar ang lider sang sperm junior gang.
Ini amo si John Rey Bermejo, alyas “Dako”, 24, kag ginatawag nga master sang nasambit nga gang.
Sa exclusive interview sang Bombo Radyo kay Punong Barangay Edna Cajilig, iya ginpahayag nga masami nga ginadala ni alyas Dako ang iya nga gang kag naga-inom sa barangay.
Suno kay Cajilig, ginpaandaman na niya si alyas Dako nga indi na magdala sang iya mga abyan agud wala sang may magluntad nga gamo sa ila barangay.
Ginkumpirma man ni Cajilig nga nagaguwa kun gab-i si alyas Dako sa diin ginarason sini nga nagatrabaho ini sa paghimo sang apa sang lumpia sa Iloilo Terminal Market.
Apang suno sa opisyal ginbalibad ni alyas Dako nga wala man sila sang gang kag grupo lang niya ang iya mga bisita.
Matandaan nga ang sperm junior gang ang ginatuldo nga nagrambol sa Sunburst Park sa JM Basa St., Iloilo City Proper sa diin tatlo ang nabun-an.
