ILOILO CITY – Deny nor confirm si Iloilo City Mayor Jerry Treñas kun magaupod sa iya gintukod nga Uswag Partylist si anay Iloilo City Councilor Nielex ‘Lex’ Tupas.
Sa exclusive interview sang Bombo Radyo kay Treñas, iya ginpahayag nga nagbisita sa iya balay si Tupas apang wala man ini nagbukas sang topiko may kaangtanan sa politika.
Suno kay Treñas, daw kaangay nga nagapangita pa si Tupas sang buylo.
Pahayag sang alkalde nga samtang nagahilapit na ang pagpiniliay, naga amat-amat naman init ang isturyahanay tuhoy sa politika.
Samtang, matandaan nga sa interview sang Bombo Radyo kay Tupas, iya ginpahayag nga bukas man siya kag ang iya nga asawa nga si Iloilo City Councilor Dr. Candice Tupas nga mangin kabahin sang nasambit nga partylist.
Nahibaluan nga una na nga gintanyagan sang isa ka slot sa idalom sang Uswag Partylist ang iya utod nga si Iloilo 5th District Rep. Raul ‘Boboy’ Tupas.
