ILOILO CITY- Nalakip ang isa ka Ilonggo sa second batch sang mga Filipino satellite builders nga i-train sa idalom sang Space Science and Technology Proliferation through University Partnerships ukon STeP-UP Program.
Sa interview sang Bombo Radyo kay Gio Asher Tagabi sang Tubungan, Iloilo apang nagatinir sa Quezon City, iya ginpahayag nga dako nga pagpanghangkat kag kadungganan nga napilian siya bilang isa sa walo ka mga scholars.
Suno kay Tagabi, ang Electrical and Electronics Engineering Institute (EEEI) sang University of the Philippines amo ang magahanas sa ila agud i-apply ang ila ihibalo kag kaalam sa paglunsyar sang Maya 5 kag Maya 6.
Nahibaluan nga ang una batch amo ang utok sa likod sang paghuman sang labing-una nga locally built nano- ukon cube satellites nga Maya 3 kag 4.
Pahayag pa ni Tagabi,nagaserbi bilang project manager sang batch, nga ang mga satellites nga ila himuon ang ginalauman nga maka- contribute sang dako sa economic, territorial, kag disaster risk reduction efforts sang pungsod.
Nahibaluan nga kaupod man ni Tagabi sa second batch sang mga scholars amo sanday: Chandler Timm Doloriel sang Surigao del Norte; 2nd Lt. Genesis Remocaldo sang Clark Air Base Pampanga; Anna Ruth Alvarez sang Misamis Oriental; Angela Clarisse Chua from Manila; Joseph Jonathan Co sang Valenzuela City; Ronald Collamar sang Bulacan; kag, Khazmir Camille Valerie Macaraeg sang Quezon City.
Si Tagabi ang nagtapos sang kurso nga Bachelor of Science in Electronics Technology sa Iloilo Science and Technology University.
