ILOILO CITY – Ginpatpat sang Legal expert ang mga kaso nga mahimo ipasaka may kaangtanan sa mga kinagamo sang gang sa syudad sang Iloilo.
Ini bangud nangin sentro sang mga balita sa syudad ang youth-gang related incidents matapos ang sundanay nga rambol sa Iloilo City Proper.
Sa interview sang Bombo Radyo kay Atty. Joenar Pueblo, iya ginpahayag nga consititutional right sang isa ka tawo nga maghugpong ukon mag-angkon sang grupo.
Apang suno kay Atty. Pueblo makabig nga sala ini kun ang ginahimo nga hulag sang grupo amo ang pagpamuno sang gamo, sakitanay kag patyanay.
Pahayag ni Atty. Pueblo, mahimo pasakaan ang mga myembro sang gang sang kaso nga attempted homicide kag suspected murder kun sila ang may ginpatay.
Alarms and scandal naman ang mahimo man ipasaka kun ang mga grupo naga-obra sang noise pollution ukon iskandalo sa mga dalanon.
Samtang, ginpahayag man ni Atty. Pueblo nga ang mga miyembro sang grupo nga lunsay mga menor de edad, salabton ini sang ginikanan.
Dugang pa sang natungdan nga makabig nga Child Abuse ang mahimo ipasaka sa mga ginikanan nga nagahungod paobra sa ila mga kabataan ilabi na kun kagab-ihon.
