ILOILO CITY – Duha ka anggulo ang ginalantaw sang Lapaz Police Station sa rason sang pagpatay sa isa ka lalaki nga nasapwan kag natabunan sang hilamon sa talamnan sa Brgy. Banuyao, La Paz, Iloilo City.
Ang biktima amo si Mark Henry Alpasan, 29, isa ka tricycle driver, residente sang Barangay Concepcion, Iloilo City Proper kag una na gin-report nga missing sang Nobyembre 24.
Sa exclusive interview sang Bombo Radyo kay Police Major Edfel Balibadlan, hepe sang La Paz Police Station, iya ginpahayag nga may posibilidad gindala na sang wala pa makilal-an nga suspek si Alpasan sa nasambit nga lugar sa diin ini ginpatay kag ginbilin ang ginamaneho sini nga traysikol sa Lapaz Plaza.
Mahimo man suno kay Balibadlan nga ginpick-up ang biktima sa nasambit nga Plaza sa diin ginbilin ang traysikol sini.
Pahayag ni Balibadlan nga may mga Close Circuit Television (CCTV) cameras sila nga gintsikyar sa mga lugar malapit sa Plaza kun sa diin nakit-an nga naka-park ang tricycle sang biktima.
Apang ginpahayag ni Balibadlan nga wala sila sang may nakuha sa nasambit nga mag CCTV cameras bangud guba ang mga ini.
Dugang pa sang natungdan nga padayon sa pag-imbestiga ang mga otoridad sa matuod nga motibo sa pagpatay kay Alpasan.
