ILOILO – Arestado ang isa ka lalaki nga bag-o lang ginkasal bangud sang iya kaso nga rape nga siyam ka tuig niya nga ginpanaguan.
Ang suspek amo si Del Mark Gonzaga, 28, residente sang Barangay Barusong Tigbauan, Iloilo samtang ang biktima naman amo si alyas “Gema”, residente sang Nueva Valencia, Guimaras.
Sa interview sang Bombo Radyo kay Police Lt. Val Cambel, hepe sang Sibunag Municipal Police Station, iya ginpahayag nga sang nagligad lang nga semana ginkasal si Gonzaga kag wala makahuna-huna ang asawa sini nga may background ini sa pagpanghimulos.
Suno kay Cambel, tuig 2011 pa nga wanted ang suspek sa kaso nga 2 counts rape sa Nueva Valencia, Guimaras.
Pahayag ni Cambel nga kaduha ginhimuslan ang biktima nga si Alyas Gem nga amo ang menor de edad sang natabo ang insidente.
Pahayag sang natungdan nga magapangatubang sang kaso nga paglapas sa Republic Act 8353 ukon The Anti-Rape Law of 1997 ang suspek.
