ILOILO – Luyag nga ipabatyag sang Local Government Unit sang Tubungan, Iloilo ang ispirito sang Paskwa sa mga pumuluyo pinaagi sa pagbutang sang gamay nga dekorasyon.
Sa interview sang Bombo Radyo kay Mayor Roquito Tacsagon, iya ginpahayag nga nagbutang man sila sang gamay nga suga agud magsanag kag mabatyagan sang nasambit nga banwa ang ispirito sang Paskwa.
Suno kay Tacsagon, apisar nga may problema nga dala sang pandemya, importante nga wala nagakalipat sa pagsug-alaw sang pagkatawo ni Hesus.
Pahayag ni Tacsagon nga ang tema sang ila Paskwa amo ang “Kasanag sang banwa para sa paalabuton nga mga kubos para sa banwa sang Tubungan”.
Dugang pa sang natungdan nga may mga pagsulundan man nga ipatuman sa mga plaza sa diin alas 6:00 tubtob alas 9:00 sang gab-i lang mahimo makalagaw ang mga pumuluyo.
Hugot man nga ipatuman ang health protocols sa diin magabantay ang mga otoridad kag barangay tanod.
