ILOILO – Nagapabilin sa gihapon ang probinsya sang Iloilo nga Rice Basket kag Rice granary sang Western Visayas.
Ini apisar nalapawan sang Negros Occidental ang Probinsya sang Iloilo sa rice production.
Sa interview sang Bombo Radyo kay Dr. Ildefonso Toledo, Iloilo Provincial Agriculturist, iya ginpahayag nga nagasunod lamang sadto ang Negros Occidental sa probinsya sang Iloilo nga may pinakadamo nga napatubas nga humay.
Apang gin-athag ni Toledo nga ginpangibulahan man niya ang Negros Occidental bangud nagdangat sa average nga 4 metric tons per hectare sang humay ang ila nga napatubas.
Bangud diri nalapawan ang produksyon sang Iloilo sang humay nga may yara lamang sang 3.5 metric tons per hectare nga napatubas.
Ini bangud nagagamit suno kay Toledo sang hybrid nga binhi sang humay ang Negros Occidental.
Pahayag ni Toledo nga santo sa data nga ginpaguwa sang Provincial Agriculture Office sang Iloilo, humalin Hunyo tubtob Setyembre subong nga tuig, nagdangat sa 622, 826.87 metric tons ang napatubas sang probinsya sang Iloilo samtang yara naman sa 313, 939 metric tons ang napatubas sang Negros Occidental.
Dugang pa sang natungdan nga kun basehan lamang ang patubas, abanse ang probinsya sang Iloilo apang kun performance sang mangunguma kada ektarya ang paga-isturyahan, nagapanguna diri ang Negros Occidental.
