ILOILO CITY – Nagpaathag ang AC Energy sa mga pumuluyo nga wala pa nakabaton sang cash assistance nga naapektuhan sang oil spill matapos naglupok ang ila power barge sa Syudad sang Iloilo.
Sa interview sang Bombo Radyo kay Gabino Ramon Mejia, pinuno sang Plant Operations sang AC Energy, iya ginpahayag nga naga-facilitate lamang sila kag ang insurance amo ang nagabayad kag nagaproseso sang nasambit nga cash assistance sa diin madamo sang ginapangayo nga requirements sa claimants.
Suno kay Mejia, agud mapadasig ang proseso, nagkuha man sila sang mga abogado agud mahitso kag ma follow up ang reklamo sang mga pumuluyo.
Pahayag ni Mejia nga bangud sang COVID-19 pandemic kag lockdown, nadugayan ang documentation kag coordination sa proseso sang cash assistance.
Naghingyo man ang natungdan sa mga claimants nga magsunod sa proseso kag kompletuhon ang mga dokumento agud mas mapadasig ang paghatag sang ayuda.
Matandaan nga Hulyo 3 sang naglupok ang power barge nga may unod nga 300,000 liters sang bunker fuel sa Bo. Obrero, Lapuz, Iloilo City.
Nagdangat naman sa 48,000 liters ang nagtaas nga bunker fuel sa diin indi lang ang mga baybayon sa Syudad sang Iloilo ang apektado kundi mangin ang Guimaras kag Iloilo Province.
