ILOILO CITY – Ginpanginwala sang isa ka lesbian ang alegasyon nga may kaangtanan siya sa kamatayon sang isa ka tricyle driver sa Brgy. Banuyao, La Paz, Iloilo City.
Ang nasambit nga lesbian amo si alyas “Budong”, samtang ang biktima naman amo si Mark Henry Alpasan, 29, kag lunsay residente sang Barangay Concepcion, Iloilo City Proper.
Sa interview sang Bombo Radyo kay Alyas Budong, iya ginpahayag nga indi niya kilala sang lubos si Alpasan kag indi matuod ang ginapahayag nga may yara sang love triangle sa ila.
Suno kay Budong, masami gid lamang siya nagasakay sa tricycle ni Alpasan kag nangin suki man bangud isa lamang sila ka lugar.
Indi man matuod suno kay Badong nga love triangle ang rason bangud wala man siya sang pangimunan bangud indi matuod nga may yara siya sang live in partner.
Santo naman sa imbestigasyon sang La Paz police station, natukiban nga nakaagi na preso si Alyas Budong sa sulod sang isa ka dekada kag nakaguwa sang tuig 2018 sa kaso nga paglapas sa RA 9165 ukon mas kilala nga Comprehensive Dangerous Drugs Act of 2002.
Matandaan nga Nobyembre 24 una ginreport nga missing si Alpasan kag nasapwan nga patay na kag natabunan sang hilamon sa talamnan sang Nobyembre 30.
Sa subong, padayon sa pag-imbestigar ang mga otoridad sa matuod nga motibo sa likod sang krimen.
