ILOILO CITY – Nakahanda nga magbulig ang National Police Commission (NAPOLCOM) sa kaso sa kamatayon sang police asset sa Barangay Abilay Sur, Oton, Iloilo.
Ang biktima amo si PCpl. Felfranz Lumahang, na-assign sa Iloilo Provincial Drug Enforcement Unit.
Matandaan nga sa spot report sang Iloilo Police Provincial Office, ginluthang-patay si Lumahang sang suspek nga naga-angkas sa motorsiklo las 3:15 sang hapon sang Nobyembre 28 samtang ginaalegar nagahulat siya sa subject sa drug buy-bust operation.
Base sa rekord sang log book sa Iloilo Doctors Hospital kun sa diin gindala si Lumahang, las 3:50 sa hapon nag-abot ang bangkay kag accidental firing ang ginapahayag nga rason sang mga nagdul-ong sa iya.
Anom ka mga lalaki nga ginapahayag back-up man ni Lumahang sa follow-up operation ang nagdala sang iya nga bangkay.
Duha ka salakyan ang nagdala kay Lumahang sa ospital kag ginkarga ang biktima sa iya mismo nga kotse.
Sa exclusive interview sang Bombo Radyo kay Atty. Joseph Celis, regional director sang NAPOLCOM Region 6, iya ginpahayag nga nakahanda sila nga magbulig sa pamilya ni Lumahang sa tion nga magdangop ini sa iya opisina.
Suportado man ni Celis ang pagtukod sang isa ka special task force nga magatutok sa kamatayon ni Lumahang.
Samtang, indi man mapilit ang hepe sang Oton Municipal Police Station nga si Police Captain Robert Jayson Pancha sa pagsabat sa nasambit nga kaso bangud katungdanan na ini ni Police Provincial Office Director Police Colonel Gilbert Gorero.
Una na nga gin-ako ni Gorero nga lehitimo nga drug buy bust operation ang gin-updan ni Lumahang.
Apang nagapabilin nga palaligban bangud suno sa mga residente wala sang may natabo nga drug buy bust operation sang tion nga ginluthang si Lumahang.
Mismo si Punong Barangay Antonio Masculino Jr., Abilay Sur, Oton, Iloilo ang nagpahayag nga las 5:30 sang hapon, sang Nobyembre 28, yara pa siya sa lugar kun sa diin natabo ang krimen.
Mangin ang mga obreros sang ginakaayo nga radial road ang wala man nakita nga mga tawo sa lugar sa diin natabo nga krimen baliskad sa pahayag sang mga otoridad.
