ILOILO – Isa sa ginakabig nga dako nga problema nga nagatuga sang pagkatiphag sang duta amo ang pagtanum sang mga mais sa kabukiran sa pila ka mga banwa sa Northern Iloilo.
Sa interview sang Bombo Radyo kay Punong Barangay Norly Plantig sang barangay Pasayan, Batad, Iloilo, iya ginpahayag nga bisan diin lamang nga kabukiran kun may mga pagtanum sang mais, may yara sang nagakatabo nga soil erosion kag paglandslide.
Tuman ini ka delikado suno kay Plantig bangud ginatunaan ini sang kakugmat sang pumuluyo ilabi na nga madamo na sang kabuhi ang ginabawi kun magtiphag ang duta.Ini bangud wala sang kahoy nga mahimo makapugong sa tubig-baha.
Naghingyo man si Plantig sa mga pumuluyo nga kuntani makamarasmas na agud magtanum na sang kahoy sa kabukiran agud may makapugong sa tubig-baha.
Samtang ginpahayag naman sang isa ka manugmais sa San Rafael, Iloilo nga wala man sila sang iban nga alternatibo sa pagpangita sang palangabuhian magluwas sa pagtanom sang mais.
Sa interview sang Bombo Radyo kay Richard Lacap, residente sang amo nga lugar, iya ginpahayag nga sa kadugayon nga nagapananum ini sang mais sa kabukiran wala man sang landslide nga natabo sa ila nga lugar.
Suno sa natungdan, maiwat man ang pangabuhi kag pagtanum lang sang mais ang ila nahibaluan nga source of income.
Sa pihak nga bahin, kapin 12 ka mga barangay sa San Dionisio, Iloilo ang ginbaha matapos nagbubu sang damlag lang ang mamunog nga ulan.
Sa interview sang Bombo Radyo kay Mayor Darwin Bajada, iya ginpahayag nga bangud sa kalbo nga kabukiran kag pagtanom sang kamaisan, gintunaan ini sang tuman nga pagbaha.
Suno kay Bajada, ang pag-ulan ang ginakakulbaan man sang pumuluyo bangud madasig magtaas ang tubig baha.
Pahayag sang alkadle nga may pagsinapol man sila sang Department of Environment and Natural Resources (DENR) agud ipatuman ang plano nga pagtanom sang mga kahoy.
