ILOILO – Nagapasalamat ang bag-o nga director sang Iloilo Police Provincial Office (IPPO) sa suporta nga ginhatag sa iya sang probinsya sang Iloilo.
Sa interview sang Bombo Radyo kay Police Colonel Gilbert Gorero, iya ginpahayag nga indi madali ang responsibilidad kag kahigayunan nga ginhatag sa iya, apang tuman ang iya pasalamat sa pagsalig nga ginhatag sang Iloilo Provincial Government kag ni Iloilo Governor Arthur Defensor Jr.
Suno kay Gorero, nagapasalamat man siya sa pamunuan sang Police Regional Office 6 nga nagrekomenda man sa iya sa national headquarters agud mangin full pledged na nga director sang IPPO.
Nagpanugyan man si Gorero sa kapulisan nga responsibilidad nila nga matapna ang krimen.
Ini ang may kaangtanan man sa kontrobersyal nga kamatayon sang isa ka police asset nga Pol. Corporal Felfranz Lumahang nga ginapahayag ginluthang-patay sa isa ka drug buybust operation sa Abilay Sur, Oton, Iloilo.
Lakip man sa mga programa nga igalunsyar ni Gorero sa pagpamuno sa IPPO, amo ang padayon nga pagtapna sang iligal nga droga, war against criminality, war against insurgency, war on corruption kag war against all forms of illegal gambling.
Sa paglunsyar sang nasambit nga programa, importante suno kay Gorero ang integridad, dignidad kag disiplina.
Nagakadapat nga may yara sang unified effort ang dignidad sa kapulisan, integridad nga obrahon ang tanan nga ikasarang agud makahatag hustisya, kag disiplina nga mangin ehemplo sa pumuluyo.
Dugang pa sang natungdan nga kun may yara sang dignidad, integridad kag disiplina, mas mapadali ang pagsalig sang pumuluyo sa katapo sang Philippine National Police.
