ILOILO CITY – Nagpaandam ang COVID-19 Team sang Iloilo City Government sa mga nagapeke sang dokumento agud makasulod sa syudad sang Iloilo sa holiday season.
Sa interview sang Bombo Radyo kay Jeck Conlu, spokesperson sang COVID-19 Team, iya ginpahayag nga sa mga nagaplano nga magpauli sa Paskwa nga mga Authorized Persons Outside Residence (APOR), Locally Stranded Individuals (LSIs), Returning Overseas Filipinos (ROFs) ukon Overseas Filipino Workers (OFWs), kinahanglan nga insakto kag kompleto nga dokumento ang tipunon kun magpauli sa syudad.
Suno kay Conlu, ang mga nasambit nga magapauli ang mahimo makig-angot sa Operation Center sa City Hall may kaangtanan sa mga dokumento nga lakip sa requirements.
Nagpaandam man si Conlu sa mga nagaplano nga magpeke sang dokumento, ilabi na ang tampered nga mga RT-PCR test, nga kun may matukiban, mahimo gid nga presuhon.
Mas ginpahapos na suno kay Conlu sang Iloilo City Goverment ang pagkuha sang mga dokumento gani wala na sang rason ang mga mapauli nga magapeke sang mga papeles.
Dugang pa sang natungdan nga ginahingyo lamang sang syudad nga kompletuhon ang mga information kag data nga ginapangayo kag sundon ang mga protocol agud matalunsay ang pagpauli kag malikawan ang COVID-19 infection.
Samtang, ginpahayag ni Conlu nga ginahulat nalang ang executive order sa diin tanan nga mapauli ang gilayon nga mapaidalum sa COVID-19 test.
Ini bangud suno kay Conlu, may yara sa gihapon sang mga nagapauli nga nagapositibo.
Agud masiguro nga wala na sang import cases sang COVID-19, ipatuman ang pagtest sa tanan nga mapauli sa diin isa tubtob duha ka adlaw lamang makuha na ang resulta.
Wala naman sang kabalakhan ang pumuluyo bangud libre na sang syudad ang tanan nga testing sa COVID-19.
