ILOILO – Ginakabig nga problema sang alkalde sang Sara, Iloilo ang pagtanom sang kamaisan sa ila kabukiran nga ginatunaan sang pagbaha.
Sa interview sang Bombo Radyo kay Mayor Jon Aying, iya ginpahayag nga ang kagulangan ukon ang protected forest sa ila banwa ang may kalapadon nga 4,200 hectares sa diin 200 hectares nalang ang nabilin nga wala gintanuman sang mais.
Suno kay Aying, ginabanta nga masobra 50 na ka-tuig ang maisan nga ginakabig pangabuhian sang mga pumuluyo sa ila banwa.
Apang suno kay Aying, ila naobserbahan nga wala man nagaumwad ang pangabuhi sang mga manugmais kag nagakaguba lamang ang kagulangan.
Pahayag sang alkalde sa kapin 10 ka barangay kag 249 ka mga pamalay ang apektado sang mga pagbaha.
Sa subong, suno sa opisyal, nagaupod man sila sa programa nga enhance greening sa diin nagatutok ini sa pagtanom sang kahoy sa pagpanguna sang Department of Environment and Natural Resources.
