ILOILO – Ginhiwat sa pinakauna nga kahigayunan ang Iloilo Investment Forum sa syudad sang Iloilo lakip na ang Iloilo Economic Development (ILED) Foundation.
Sa interview sang Bombo Radyo kay Engr. Terrence Uygonco, chairperson sang ILED, iya ginpahayag nga ini nga kahiwatan ang makaganyat sa mga investors sa agriculture, tourism, infrastructures kag iban pa.
Ini ang makadala suno kay Uygonco sang economic activities sa probinsya kag syudad sang Iloilo agud mapadayon ang pagpasangkad sang ekonomiya.
Pahayag ni Uygonco, lakip sa nasambit nga forum ang gintambongan sang ILED, Iloilo Provincial kag City Government kag mga private and business sectors.
Samtang, madamo naman sang mga ginplastar si Iloilo City Mayor Jerry Treñas nga plano para sa syudad.
Sa interview sang Bombo Radyo kay Treñas, iya ginpahayag nga lakip sa mga ginplastar niya nga plano amo ang privitization sang Iloilo Terminal Market, Central Market kag ang mga slaughterhouse agud masigurado ang kalimpyo, pagdugang sang duta sa syudad para sa development kag business recovery program.
Pahayag sang alkalde , may yara na sang mga nagaka-interes nga mga inventors nga magpatukod sang negosyo sa syudad ilabi na sa Business Process Outsourcing, real estate development kag mga condominium unit properties.
Sa pihak nga bahin, ginpahayag ni Iloilo Provincial Governor Arthur Defensor Jr. nga ini nga forum ang oportunidad man para sa probinsya sang Iloilo nga iwaragwag sa mga private sectors ang areas kun sa diin sila pwede makigbahin.
Sa interview sang Bombo Radyo kay Defensor, iya ginpahayag nga lakip sa iya gintuad amo ang development sang hospitals, agricultural products kag ang sports complex bilang worldclass sports arena para sa healthy system sa new normal sa syudad kag probinsya sang Iloilo.
Pahayag sang natungdan , kinahanglan sang partisipasyon sang mga private sectors agud matigayon ang mga ini sa ginapaabot nga matalunsay nga new normal sa masunod nga tuig.
