ILOILO – Arestado ang isa ka amay matapos makapila ka beses nga ginhimuslan kag ginpabusong ang kaugalingon nga anak sa Leon, Iloilo.
Ang suspek amo si Juan, 43, samtang ang biktima amo si alyas Inday, 19, kag lunsay residente sang nasambit nga lugar.
Sa interview sang Bombo Radyo kay Police Lieutenant Sammy Gasataya, hepe sang Leon Municipal Police Station, iya ginpahayag nga ginhimuslan ni Juan ang iya kaugalingon nga anak umpisa sang 12 anyos palang ini.
Suno kay Gasataya, ginpahog si alyas Inday sang iya amay rason nga padayon ang pagpanghimulos nga natabo kag wala ini nagpanugid bangud sa kahadlok.
Nagbusong suno kay Gasataya si alyas Inday sang tuig 2014, apang ginsugo sang amay nga imnan sang bulong sang pito na ka-bulan ang bata sa iya tiyan rason nga wala na isahan ka semana ang lapsag kag napatay.
Nagpadayon ang pagpanghimulos sang suspek sa diin tuig 2016 nagbusong liwat ang iya nga anak kag nagbun-ag sang tuig 2017.
Dugang pa sang natungdan nga matapos natukiban sang pamilya ang natabo kay Inday, nagpalagyo ang suspek padulong sa Hinoba-an, Negros Occidental kun sa diin ini nadakpan pinaagi sa bulig sang himata sang biktima kag sang Hinoba-an Municipal Police Station.
