Padayon pa nga ginatumod sang kapulisan ang mga suspek nga nagluthang-patay sa isa ka lalaki sa Barangay Tabuc Suba, Jaro, Iloilo City.
Ang biktima amo si Enranil Umadhay, 54 anyos, residente sang MH Del Pilar, Jaro, Iloilo City.
Sa interview sang Bombo Radyo kay Alias Nono, isa sa mga nakakita sa insidente, iya ginpahayag nga nagasakay sa angkar angkar ang biktima kag pakadto na kuntani sa Tacas, Jaro sang gin-tiro sang riding-in-tandem suspects.
Nakasuksok sang jacket, helmet, kag bonnet ang mga suspek kag gilayon man nga nalagyo matapos ang natabo nga krimen.
Suno kay Alias Nono, may bata pa nga upod ang biktima sang natabo ang pagpangluthang apang nakalumpat ini kag nakadalagan amo nga nga wala nadalahig.
Ginaalegar duha ka lupok ang nabatian.
Sa inisyal nga impormasyon sang natungdan, sa likod ang pilas sang biktima.
Ginkumpirma naman ni Punong Barangay Larry Palomo sang Barangay MH Del Pilar, Jaro, Iloilo City nga nakaserbe anay bilang barangay kagawad sa ila lugar ang biktima nga si Enranil Umadhay.
Sa interview sang Bombo Radyo kay Palomo, iya ginpahayag nga samtang nagapungko si Umadhay bilang barangay kagawad, gin-aresto ini bangud nadakpan nga nagahupot sang iligal nga droga.
Suno kay Palomo, napreso si Umadhay sa sulod sang anum ka tuig.
Pagkagwa sa presuhan, nagpadalagan ini liwat bilang barangay kagawad kag nagdaug.
Sa masunod nga pagpadalagan, napierde na si Umadhay amo nga nagtutok na lang sa iya nga negosyo sa pagbaligya sang karne sang baboy.
