ILOILO CITY- Handa na ang Iloilo City Government sa pagsugod sang simbang gabi.
Sa interview sang Bombo Radyo kay Mr. Jeck Conlu, spokesperson sang COVID-19 team sang syudad, iya ginpahayag nga may yara sang ipangdeploy sa simbahan nga mga katapo sang Public Safety and Transportation Management Office, Philippine National Police kag mga volunteer groups.
Suno kay Conlu, magluwas sa paghatag sang seguridad, katungdanan sang deployment team nga ipatuman ang minimum health protocol sa mga sumilimba kaangay sang social distancing kag pagsuksok sang facemasks agud malikawan ang paglapta sang coronavirus disease 2019.
May kaangtanan naman sa ginapatuman nga curfew humalin alas otso sa gab-i tubtob alas kwatro sa kaagahon para sa mga menor de edad, gin-athag ni Conlu nga mahimo maggwa ang mga ini sa balay sa tion sang curfew hours agud magtambong sa misa sa kondisyon nga may upod sila nga ginikanan ukon guardian.
Sa bahin naman sang Probinsya sang Iloilo, gin-adjust man paagi sa isa ka ordinansa ang curfew hours.
Sa interview sang Bombo Radyo kay Iloilo Governor Arthur Defensor Jr., iya ginpahayag nga sa baylo nga alas nuebe sa gab-i tubtob alas kwarto sa kaagahon ang curfew, ini ang magasugod na sa alas-dies sa gab-i kaga magatakop sa alas-kwatro sa kaagahon.
Suno kay Governor Defensor, katuyuan sini nga mahatagan sang ligwa ang oras sang pagpauli sang mga tawo ilabi na ang mga empleyado bangud ginalauman ang pag-extend sang mga ini sa trabaho subong nga holiday season.
Magluwas diri, gin- adjust man ang curfew para sa simbang gabi agud mas malawig ang oras sang mga tawo nga nagapauli pagkatapos sang ila pagtambong sa misa.
