Patigayunon ang pre-charge investigation sa pulis nga nagpalupok sang armas sa Barangay Bita-og Gaja, New Lucena, Iloilo.
Ang pulis amo si Police Staff Sergeant Agar Octaviano, imbestigador sang New Lucena Municipal Police Station.
Sa interview sang Bombo Radyo kay PLtCol. Manny Manuel, pinuno sang Provincial Internal Affairs Service, iya ginpahayag nga sa tion nga matukiban nga may yara sang probable cause sa kaso sang pulis, ini ang ipasaka gilayon para sa summary hearing.
Santu sa affidavit nga ginpasa ni Octaviano, gin-protektahan lang niya ang kaugalingon pinaagi sa warning shot.
Samtang imbestigaran man sang Police Regional Office 6 ang kaso ni Octaviano.
Suno kay PBGen. Rolando Miranda, director sang Police Regional Office 6 ,
kun mapamatud-an nga may yara sang sala ang pulis, indi siya mag duha-duha nga pasakaan ini sang kaso.
Apang kun magguwa sa imbestigasyon nga wala ini sang sala, handa gid magbulig ang Police Regional Office 6 kay Octaviano.
Dugang pa sang director, ang nagsumbag sa pulis nga kaupod sang grupo nanday Andy Somido ang nagakadapat man nga kasuhan.
Nahibaluan nga nagpadulong si Octaviano sa Barangay Bita-og Gaja sang Disyembre 10 sa iya nga amay sa diin sang manugpauli na ini , naghapit siya sa sa ila duta kun sa diin nagkit-anay sila sang grupo ni Somido.
Ginapahayag nga may daan na nga hiligut-anon sa tunga nanday Octaviano kag Somido bangud man sa away sa duta.
