ILOILO CITY – Indi na pag-ipasira ang chain of restaurants nga “family-owned” sa syudad sang Iloilo sa diin nagpositibo sa COVID-19 ang tag-iya kag staff nila nga nagaprepar sang pagkaon.
Sa interview sang Bombo Radyo kay Iloilo City Mayor Jerry Treñas, iya ginpahayag nga nagakooperar na kag nagpakig-angot ang tag-iya sang restaurant sa COVID-19 Team sang Iloilo City Government.
Suno kay Treñas, magapaidalum man ang tanan nga empleyado sang nasambit nga restaurant sa swab testing ukon real-time reverse transcription polymerase chain reaction (RT-PCR) test.
Una na nga ginpangalanan sang alkalde ang DOVA restaurant nga may catering services man nga wala nagakooperar sa ila apisar makapila ka beses na siya nga naghatag sang warning.
