ILOILO CITY- Nagapati ang isa ka opposition senator nga indi death penalty ang solusyon sa nagakatabo nga serye sang pagpamatay sa pungsod sa diin involved ang mga katapo sang law enforcement agencies kaangay sang natabo nga pagpatay sang pulis sa mag-iloy sa Paniqui, Tarlac.
Sa interview sang Bombo Radyo kay Senador Franklin Drilon, Senate Minority leader, iya ginpahayag nga kun maayo ang pagpatuman sang layi, indi na kinahanglan nga ibalik ang nasambit nga capital punishment.
Suno sa senador, isa ka ehemplo sang culture of impunity sa pungsod amo ang kaso ni Police Senior Master Sergeant Jonel Nuezca sa diin bag-o pa man natabo ang pagpatay niya sa mag-iloy nga sanday Sonya Gregorio, 52, kag anak nga si Frank Anthony Gregorio, 25, lunsay residente sang Barangay Cabayaoasan, Paniqui, Tarlac, may mga kaso na ini sang homicide sadto apang lunsay na-dismiss lang.
Nagpasalig naman ang senador nga magapatigayon sang maid-id nga imbestigasyon ang senado tuhoy sa sini nga mga kaso.
