ILOILO – Hustisya ang ginasinggitan sang pamilya ni Karina, 29-anyos nga call center agent nga tumandok sang Barangay Bololacao, New Lucena, Iloilo, kag una na gin-report nga naghikog sa ila balay sa Taguig City sang bisperas sang Paskuwa, Disyembre 24.
Si Karina amo man ang iloy sang duha ka mga bata nga nagaedad tatlo ka tuig kag isa ka tuig nga napatay man matapos ginbitay sang ila nga amay sa adlaw mismo sang Paskuwa.
Nagsungka sa mga pulis ang suspek nga si Aiko Siancunco, 29, bana ni Karina, residente sang Kamias St., North Signal, Taguig City, kag nag-ako nga siya ang nagpatay sa iya duha ka mga bata.
Sa exclusive interview sang Bombo Radyo kay Gina Maribong, nanay sang biktima, iya ginpahayag nga wala man naga-istorya si Karina sang iya nga problema ukon may kaangtanan sa iya nga bana kag masami lamang ini nagahambal nga yara man sa maayo nga kahimtangan.
Apang suno kay Maribong, may pagkadominante kag maimon ang pagkakilala nila sa bana ni Karina nga si Siancunco.
“Daw gusto ya siya lang atubangon sang amon bata, maimon siya.”
Nagahilibion nga ginpahayag sang iloy nga luyag nila ipadala papuli sa ila lugar ang bangkay ni Karina kag duha ka mga bata sini apang 250,000 ang bayad kag kulang pa ang ila nga kuwarta.
Ginpahayag ni Maribong nga gin-asikaso sang iya nga bana sa Manila ang autopsy sa lawas ni Karina kag nakit-an sa resulta nga ginkuga ang ila nga bata kag wala nagpanginmatay.
Samtang, tuman naman ang kainit nga nabatyagan sang iloy kay Siancunco nga amo ang ginapatihan nga nagpatay sa iya nga bata kag duha ka apo nga tatlo kag isa ka-tuig.
“Tama gid kasakit, daw kanami maglupad pa-manila kag pukpukon ulo na, daw sa ano bala nga ginhawa mo kapadako ka bata tapos patyon ya lang ya,” pahayag ni Marbong.”
Indi ka na makaguwa, antuson mo kag bayaran mo ang ginhimo mo nga ano kasakit ang ginhimo mo sa pamilya namon. Mapatay kana tani sa sulod,” dugang pa sang natungdan.
