Gintunaan sang paglapas sa health protocol ang pagpanagtag sang Social Amelioration Program ukon ayuda sa mga drivers sa Western Visayas.
Sa interview sang Bombo Radyo kay Raymundo “Boyet” Parcon, presidente sang Iloilo City Loop Alliance of Jeepney Operators and Drivers Association (ICLAJODA), iya ginpahayag nga nagpugok sa pagpila ang mga drivers sang Public Utility Vehicles sa pagkuha sang ayuda nagikan sa Land Transportation Franchising and Regulatory Board (LTFRB).
Suno kay Parcon, ini man nga ayuda ang ginpatigayon sang Department of Transportation kag Department of Social Welfare and Development(DSWD) agud mabuligan ang mga drivers nga apektado ang kinitaan bangud sa COVID-19 pandemic.
Pahayag ni Parcon nga ang mga drivers lamang nga may pangalan nga nakalista sa LTFRB ang maka-avail sang nasambit nga ayuda.
Kapin 10,000 ka mga drivers suno kay Parcon ang hatagan.
Nagpanugyan man ang natungdan sa iban nga mga drivers nga naghalin pa sa kabanwahanan, nga sa probinsya na lamang nga branch sang DSWD magpadulong agud indi magginutok sa pila sa LTFRB.
Bangud sang malaba nga pagpinilahay, ginpahayag ni Parcon nga wala na natuman ang physical distancing.
