ILOILO – Magabalik na sa trabaho ang mga empleyado sang Local Government Unit (LGU) sang Oton, Iloilo bwas nga adlaw, Disyembre 28.
Ini matapos ginpaidalom sa partial lockdown ang munisipyo sang banwa sang Oton, Iloilo umpisa Disyembre 26, nga magalawig tubtob sa Enero 3, 2021.
Ini ang kasunod sang narecord ang siyam ka kaso sang COVID-19 sa munisipyo.
Sa interview sang Bombo Radyo kay Mr. Jafet Salinas, COVID-19 focal person sang Oton, Iloilo iya ginpahayag nga sirado ang tanan nga talatapan sang municipal government offices sang banwa magluwas lamang sa pito ka opisina nga ginalakipan sang:
- Municipal Health Office
- General Services Office
- Municipal Assessor’s Office
- Municipal Treasurer’s Office
- Municipal Disaster Risk Reduction and Management Office
- Municipal Economic Development Office kag
- Business Permits and Licensing Office
Suno kay Salinas, apisar bukas ini nga mga opisina, pagasundon ang window transaction agud malikawan ang close contact sang mga personnel.
Ini bangud suno sa natungdan, nagahilapit na ang pagbayad sa real property tax sa katapusan sang bulan.
Sundon man ang tanan nga health protocols batok sa COVID-19 agud malikawan ang paglapta pa sang virus.
Nagpanugyan man ang natungdan sa publiko nga kun indi man importante ang transaction, sa masunod nalang nga tuig patigayunon agud malikawan ang pagdinugok sang tawo sa munisipyo.
