ILOILO – Nagapabilin sa gihapon nga palaligban ang identity sang duha ka persona nga nasapwan patay sa Barangay Botong, Oton, Iloilo.
Sa interview sang Bombo Radyo kay Pol. Col. Gilbert Gorero, director sang Iloilo Police Provincial Office (IPPO), iya ginpahayag nga sa inisyal nga imbestigasyon nasapawan ang pila mga Identification Cards (IDs).
Lakip sa mga nasapwan nga ID ang pila ka may pangalan Antonio Cabanatan sa diin may nagkalain-lain nga address kag Pastor Makatimpag.
Sa mga picture nga yara sa ID, kumpirmado man suno kay Gorero nga anggid sa nawong sang lalaki nga nasapwan patay.
Apang wala sa gihapon matumod ang babaye nga patay.
May nakita man nga pila ka mga fashion accesories sa crime scene.
Ginalantaw man suno sa natungdan nga may pagpangawat nga natabo.
Matandaan nga sa interview sang Bombo Radyo kay Punong Barangay Rehum Torre sang nasambit nga lugar, iya ginpahayag nga ang balay nga gintabuan sang krimen ang madugay na nga ginapa-arkilahan lang bangud nagapuyo sa isa ka subdivision sa Oton, Iloilo ang matuod nga tag-iya.
Sa ihibalo sang punong barangay, ulihi nga may nag-arkila sa amo nga balay sang bulan sang Nobyembre kag nagbayad
man sang renta sang Disyembre, Alyas Jessie ang pangalan, apang wala sang address nga ginbilin.
Gin-athag man sang Punong Barangay nga halin sang una tubtob sa adlaw nga natabo ang krimen, wala gid nila nakit-an ang duha ka senior citizens nga yara sa ila nga lugar.
Suno kay Torre, wala man sila nakamutik nga may nagaistar nga senior citizens sa amo nga balay bangud wala man sila nagaguwa-guwa.
Sang 11:30 sang gab-i antes ang krimen, may nakit-an pa ang ila kasilingan nga isa ka puti nga van kag isa ka motorsiklo nga naghalin sa amo nga balay.
Wala sang komosyon nga nabatian, wala sang pagbinaisay, kag wala sang anuman nga gahod nga nabatian halin sa balay bisan ginabanta 20 metros lang ang kalayuon sang masunod nga balay.
Blangko man ang mga kasilingan kun sin-o gid ang duha ka tigulang, kun taga-diin sila, kag kun ngaa ginpatay sila.
Posible suno sa punong barangay nga may nahimo nga sala ang duha ka tigulang sa ila matuod nga lugar kag nagpalagyo lang kuntani sa ila nga barangay.
