ILOILO CITY – Nagwangal ang mga drivers ang nga nagpila sa Land Transportation Franchising and Regulatory Board (LTFRB) agud magkuha sang Social Amelioration Program ukon ayuda.
Sa interview sang Bombo Radyo kay Raymundo “Boyet” Parcon, presidente sang Iloilo City Loop Alliance of Jeepney Operators and Drivers Association (ICLAJODA), iya ginpahayag nga wala mapahangop sang maayo sa mga drivers ang impormasyon nagikan sa Department of Transportation.
Bangud sini nagkaluruya suno kay Parcon ang iban nga mga drivers nga nagpila sang malawig kag sa ulihi natukiban nga wala sang pangalan sa LTFRB.
Suno kay Parcon, ini nga ayuda ang ginpatigayon sang Department of Transportation pinaagi sa Department of Social Welfare and Development (DSWD) kag LTFRB.
Pahayag sang natungdan, wala mapaathag sang maayo sang DSWD kag LTFRB sa mga drivers nga mahimo sila nga magpadulong sa satellite office sa ila mga lugar agud magkuha sang ayuda.
Samtang, masobra naman isa ka adlaw ang pagpila sang isa ka driver agud makakuha lamang sang ayuda.
Sa interview sang Bombo Radyo kay Lawton Pedro, isa sa mga drivers sang San Remigio, Antique kag beneficiary sang nasambit nga ayuda, iya ginpahayag nga kapin 17 sila halin sa Antique ang nagpadulong sa LTFRB agud magkuha sang ayuda.
Suno kay Pedro, ang iban niya nga kaupdanan ang nakakuha na sang ayuda bangud kahapon nga adlaw pa sila nagapila.
Pahayag sang natungdan, inadlaw ang pila nila lakip man ang iban pa nga drivers agud lamang makakuha sang ayuda.
