ILOILO – Nagasinggitan sang hustisya ang pamilya sang isa sa mga napatay sa pagserbe sang search warrant sang otoridad sa Brgy. Da-an Sur, Tapaz, Capiz.
Sa interview sang Bombo Radyo kay alyas Faye, anak ni Jomer Victor Vidal, 53, iya ginpahayag nga halos indi mapatihan nga natabo ini sa ila nga pamilya.
Suno kay Faye, may deperensya sa mata ang iya amay rason nga wala ini sang ikasarang nga magbato sa otoridad.
Dako man ang pagpati sang natungdan nga ginplantedan ang iya amay.
May armas man suno kay Faye ang iya nga amay apang ginagamit lamang ini nga proteksyon sa iya kaugalingon.
Ginpangharass sang mga pulis kag militar ang mga ginpangserbehan sang search warrant sa Tapaz, Capiz.
Sa interview sang Bombo Radyo kay alyas Marie sang Brgy. Tacayan, Tapaz, Capiz, iya ginpahayag nga ginpatay sang otoridad ang iya tiyo nga si Maurito Diaz.
Suno kay alyas Marie, magluwas sa iya tiyo nga ginpatay, gin-aresto man sang otoridad ang ila Punong barangay nga si Nonito Linggaya, Ailine Catamin, Alan Catamin, Rolis Catamin kag Marian Diaz.
Ginpahayag sang natungdan, imposible nga mangin katapo sang rebelde ang ila punong barangay kag ang iya tiyo nga isa ka mangunguma.
Gin-ako man sang natungdan nagabatyyag sila sang kakugmat sa pagpauli sa ila barangay bangud sa kahangawa nga matabo man sa ila ang gindangatan sang iya tiyo kag sang iya mga kasilingan.
