ILOILO CITY – Kontrolado na ang mga kaso sang COVID-19 sa syudad sang Iloilo.
Sa interview sang Bombo Radyo kay Iloilo City Mayor Jerry Treñas, iya ginpahayag nga kasunod sang pagpaidalom sang syudad sa MGCQ ukon modified general community quarantine status subong nga bulan sang Enero, mas mangin mahalog na ini ilabi na sa economic activities.
Apang suno kay Trenas, istriktuhan sa gihapon sang syudad ang pagpatuman sang minimum health protocol.
Pahayag sang alkalde, ginkalipay man niya ang padayon nga pagnubo sang kaso sang COVID-19 sa syudad sang Iloilo.
Matandaan nga nag-apelar si Treñas nga ibutang sa modified general community quarantine status ang syudad sang Iloilo bangud manubo na ang narekord nga kaso sang COVID-19.
Samtang, ginapanan-aw sang alkalde nga sa Setyembre 2021 pa maabot ang COVID-19 vaccine sa syudad sang Iloilo.
Bilang pinuno naman sang Committee on Vaccine Availment sa League of Cities of the Philippines, nagpanugyan siya sa publiko nga mangin vigilante samtang nagahulat pa ang syudad sang bakuna sa COVID-19.
Pahayag ni Treñas, nagapakig-angot na sila sa mga kumpaniya nga magapaguwa sang COVID-19 vaccine agud masiguro ang safe nga bakuna para sa mga Ilonggo.
