ILOILO – Nagdepensa ang Criminal Investigation and Detection Group (CIDG) Region VI kun ngaa wala sang video nga ginpresentar ang mga pulis may kaangtanan sa ginpatigayon nga simultaneous joint operations sa Tapaz, Capiz kag Calinog, Iloilo sang nagligad nga Disyembre 30 batok sa ila ginaalegar nga mga miyembro sang communist terrorist group (CTG) nga New People’s Army (NPA).
Ini ang kasunod sang labi nga nagadamo nga pamangkot sang publiko kag mga alegasyon sang pamilya sang mga napatay nga subject sa operation nga “planted ang recoveries” kag “wala nagbato ang ila mga himata apang ginpangluthang-patay sang mga pulis.”
Suno kay Lt. Col. Gervacio Balmaceda, chief sang CIDG 6, may yara sang official equipment nga gin-isyu ang PRO VI nga amo ang ginagamit sa ila operasyon agud nga ma-record ang mga ebidensya.
Suno kay Balmaceda, para lang sa still images ukon laragway ang pwede ma-capture sang amo nga equipment kag indi sarang maka-record sang video.
Ginpaathag man ni Balmaceda nga indi sila mahimo makagamit sang iban nga gadget kaangay sang cellphone bangud ang official equipment lang ang pwede nga maka-record sang ila valid nga evidence.
Ini nga paathag ang kabahin sang panindugan sang CIDG nga lehitimo ang ila ginhimo nga pagserbe sang search warrants.
Gin-implement lang suno kay Balmaceda ang search warrants kag natabo ang pagpangluthang sang mga pulis bangud ginaalegar nagbato ang mga subject.
Matandaan nga sa amo nga operasyon, siyam ang patay nga lunsay taga-Tapaz, Capiz apang baliskad sa statement sang pulis, nagpahayag ang mga pamilya nga ginpwersa nga sudlon ang ila nga mga balay kag wala sila nagbato.
May yara man sang motu proprio investigation nga ginapatigayon ang Regional Internal Affairs Service sang PRO VI. Subong nga adlaw, Enero 5, amo ang deadline para sa mga operatiba nga magpasa sang ila nga mga written report.
Magluwas diri, may yara man sang imbestigasyon ang Commission on Human Rights (CHR) Region VI agud mausisa kun may yara sang paglapas sa tawhanon nga kinamatarong sang ginserbe ang search warrants.
