ILOILO CITY – May bag-o na nga pinuno ang Department of the Interior and Local Government (DILG) Iloilo City.
Ini amo si Oscar T. Lim Jr nga tumandok sang San Jose, Antique.
Si Lim ang anay nagapungko bilang pinuno sang DILG sa probinsya sang Antique.
Sa pagpungko ni Lim bilang bag-o nga pinuno sang DILG Iloilo City, lakip sa iya ipatuman, amo ang pagpasangkad sang Road Clearing Operations.
Sa exclusive interview sang Bombo Radyo kay Lim, iya ginpahayag nga 39 pa ka mga barangay ang wala sa gihapon makapasa sang accomplishment report may kaangtanan sa ginpatigayon nga road clearing operations.
Matandaan nga Disyembre 11, 2020 pa ang ginhatag nga deadline sa mga opisyal sang kada barangay nga magpasa sang nasambit nga accomplishment report.
Kun ipaanggid naman suno kay Lim ang sitwasyon sang mga barangay sa probinsya kag Iloilo City, mas mabudlay ang sa syudad bangud sa kadamuon sang mga tawo kag may pagdugok sa trapiko.
Sa subong suno sa natungdan, padayon ang ila assessment sa syudad sang Iloilo agud makabulig kag makahatag sang suporta tubtob sa masarangan sang ahensya.
