ILOILO CITY – Ginakabig nga isa ka fire prone hazard ang mga barangay sa Molo, Iloilo City.
Sa interview sang Bombo Radyo kay Punong Barangay Roberto Niño Jr., sang Calmpang, Molo, Iloilo City kag spokesperson sang Liga ng mga Barangay sa
syudad sang Iloilo, iya ginpahayag nga bangud sa mga illegal nga koneksyon sang kuryente, dako ang posibilidad nga magluntad ang mga sunog.
Bangud sini suno kay Niño, ginadoble sang Calumpang Fire Sub-Station ang pagpaninguha agud nga mapahibalo ang mga pumuluyo may kaangtanan sa fire prevention guidelines.
Suno kay Niño, nagapatigayon man sang rekurida, inspeksyon sa panimalay kag pagpanghatag sang flyers ang Bureau of Fire Protection para sa pagpasangkad sang fire safety.
Sa subong suno sa iya, nagahugpong man ang kada opisyal sang mga barangay sa Molo, Iloilo City, agud nga malikawan na ang mga kaso sang sunog.
Matandaan nga sang Dominggo sang hapon, Enero 3, nagdangat sa 10 ka mga balay ang nasunog sa Brgy. San Pedro, Molo, Iloilo City.
Sa nasambit nga mga balay, walo ang totally burned kag duha ang partially burned.
