ILOILO CITY – Nagpapanaug na sang executive order no. 01 series of 2021 si Iloilo City Mayor Jerry Treñas nga nagamando sang mga pagpatuman sang pagsulundan matapos ginpaidalum ang syudad sang Iloilo sa Modified General Community Quarantine (MGCQ).
Sa exclusive interview sang Bombo Radyo kay Mayor Treñas, iya ginpahayag nga ang nasambit nga executive order ang pagatawgon nga omnibus MGCQ guidelines for Iloilo City.
Suno kay Treñas, umpisa subong nga adlaw tubtob Enero 30 mangin epektibo ang pagpaidalum sa syudad sa MGCQ santo sa Inter-Agency Task Force on the Management of Emerging Infectious Diseases (IATF).
Sakop sang curfew ang mga menor de edad sa diin indi ang mga ini makaguwa umpisa las 8:00 sang gab-i tubtob las 4:00 sa kaagahon.
Samtang, ginakabig naman nga vulnerable sectors ang mga naga-edad sang masobra 65 anyos, naga-edad sang 15 anyos panubo, mga nagabusong, person with comorbidities, immune-deficiencies and other risk factors kag persons with disabilities.
Ang mga nasambit nga persona ang mahimo makaguwa sa ila mga balay kun magbakala ang mga ini sang pagkaon, bulong, magpadulong sa mga ospital kag opisina.
Ginadumilian naman ini nga magsulod sa mga malls kag shopping centers.
Ginapasugtan naman ang pagbukas sang sinehan, concerts, kag iban pa nga sports activity apang limitado lamang sa 50 percent ang mga tawo nga pahanugutan.
Samtang, lakip naman sa ginadumilian amo ang mga masunod:
- Spectators sa tanan nga non-contact sports kag exercises
- Live audience kag online bulang
- Beerhouses kag mga establisyimento komersyal nga nagaserbe sang ilimnon
- Mga amusement industry
