ILOILO CITY – Ginpakamalaot ni Iloilo City Mayor Jerry Treñas ang Department of Health (DOH) kag Food and Drug Administration (FDA) bangud sa pagpangduha-duha nga magpirma sang kasugtanan sa pagbakal sang COVID-19 vaccine.
Sa interview sang Bombo Radyo kay Treñas, iya ginpahayag nga, bwas na ang deadline sang pagpirmahanay sang agreement agud nga makabakal sang COVID-19 vaccine kaupod ang Iloilo City Government, Department of Health kag AstraZeneca.
Apang suno kay Treñas, wala pulos ang tanan nga kasugtanan kun indi pa maaprubahan sang DOH kag FDA ang pagbakal sang bakuna.
“May agencies gid ya that make our life difficult,” pahayag ni Treñas.
Ginpahayag sang alkadle nga kun indi magpirma bwas ang DOH sa agreement, mahimo nga sa 2022 pa makaabot ang bakuna.
“Wala gid sila ya sang sense of urgency. Ambot kun ano gid bala ila gusto,” dugang pa sang natungdan.
