ILOILO CITY – Nagdepensa ang pamunuan sang Iloilo City Slaughterhouse may kaangtanan sa gina-alegar wala sang kasudlan ang mga baboy nga ginahatag sa mga meat vendors.
Ini matapos nagwangal man ang mga manugbaligya sa pila ka mga merkado natuhoy sa mga baboy nga nagaabot humalin sa slaughterhouse kag lunsay wala sang kasudlan.
Sa interview sang Bombo Radyo kay Rabi Fermiza, pinuno sang slaughterhouse, iya ginpahayag nga hugot nila nga ginabalabagan ang alegasyon may kaangtanan sa nagakadula nga kasudlan.
Gin-athag ni Fermiza nga ang mga baboy kun kihadon kag ihalay nagakupos ini kag nagamala.
”Ang pagkihad sang baboy kiwi na sa mu, kun hinali nga mabitay nana sa…pagmala na, nagakupos na ya ang baboy..indi nana ya parehos sang buhi pa, indi nana ya masira mayu daw kiwi nana ya ang plastar sang baboy,” ang pahayag ni Fermiza.
Ginpahayag ni Fermiza nga bantay sarado niya ang iya mga tawo kag wala siya sang may nakita nga ginabuhinan sang kasudlan ang baboy nga ginasuplay sa merkado.
Dugang sang natungdan, indi matuod nga ginabuhinan ang kasudlan sang mga baboy bangud oras nga madakpan niya nga may amo nga hitabo, siya mismo mapahalin sang iya tawo.
