ILOILO – Nangin madinalag-on ang ginpatigayon nga Dugong Bombo ang blood letting activity “Dugo Mo, Kabuhi Ko” sa Dumangas, Iloilo.
Ini ang ginpatigayon sa Dumangas gymnasium umpisa las 8:00 sang aga, Enero 8.
Sa exclusive interview sang Bombo Radyo kay Board Member Dorothy Paez, presidente sang Liga ng mga Barangay sa Dumangas, Iloilo, iya ginpahayag nga ang nasambit nga blood letting ang bunga sang pagbuligay sang Bombo Radyo Iloilo kaupod ang Liga ng mga Barangay-Dumangas chapter kag Philippine Red Cross.
Suno kay Paez, malipayon siya bangud ginsuportahan kag ginbuylogan sang mga pumuluyo ang blood letting activity.
Madamo suno kay Paez sang nagakinahanglan sang dugo adlaw-adlaw gani tuman gid ka importante ang nasambit nga kahiwatan.
Ini ang ginapatigayon suno kay Paez kada quarter sang tuig kag tuman ang iya kalipay bangud sa pihak sang COVID-19 pandemic, madamo sa gihapon sang nagadonar sang dugo.
Nagpasalamat man ang natungdan sa kooperasyon kag paghugpong sang liga ng mga barangay kag mga punong barangay sang Dumangas, Iloilo.
