ILOILO CITY – Arestado ang tatlo ka mga persona matapos ang ginpatigayon nga drug buybust operation sang Regional Police Drug Enforcement Unit (RPDEU) sa Barangay Sto. Niño Sur, Arevalo, Iloilo City.
Ang mga nadakpan amo sanday, Efren Tugado 46, residente sang nasambit nga lugar, Ace Dale Segura 34, residente sang Barangay North Avanceña Molo, Iloilo City, kag Jhone Pedilla 28, residente sang Barangay Boulevard, Molo, Iloilo City.
Sa interview sang Bombo Radyo sa Team Leader sang Regional Police Drug Enforcement Unit (RPDEU), iya ginpahayag nga nakuha sa nasambit nga operasyon ang P19,500 nga buybust money kag 10 ka sachet sang suspected shabu.
Suno sa Team Leader, anom ka mga suspected shabu ang nakuha kay Segura, tatlo kay Tugado kag isa kay Pedilla.
Ginabanta man nga P455,000 ang balor sang ginapatihan shabu nga nakuha sa mga arestado.
Pahayag sang Team Leader, napreso na sadto sa kaso may kaangtanan sa droga matapos ma buybust sang tuig 2017 ang arestado nga si Segura apang nakagwa ini sang 2018.
Samtang preso man sang tuig 2015 si Pedilla sa kaso may kaangtanan sa droga kag nakaguwa sang June 2, 2020.
Preso man sadto sang 13 ka tuig sa kaso nga Homicide ang arestado nga si Tugado.
Sa karon yara na sa kustodiya sang kapulisan sa Arevalo Police Station ang mga arestado.
