ILOILO CITY – Nagagamit sang online platform ang liga ng mga barangay sa syudad sang Iloilo agud nga ma-edukar ang pumuluyo sa ka-epektibo sang COVID-19 vaccine.
Ini ang kasunod sang pagkahangawa kag pagpangduha-duha sang pumuluyo nga magpa-inject sang nasambit nga bakuna.
Sa interview sang Bombo Radyo kay Punong Barangay Roberto Niño Jr. sang Calumpang, Molo, Iloilo City kag spokesperson sang Liga ng mga Barangay sa syudad sang Iloilo, iya ginpahayag nga ginapakigbahin nila ang mga impormasyon nagikan sa World Health Organization pinaagi sa social media agud nga mapaathag sa mga pumuluyo sang syudad ang importansya sang COVID-19 vaccine.
Suno kay Niño, nagapreparar man ang ila grupo sang flyers kag tarpaulins agud ipanghatag kag ipahamtang sa kabarangayan sa syudad agud nga mas mapasangkad ang ihibalo sang mga tawo sa nasambit nga bakuna.
Pahayag ni Niño, samtang nagahulat ang syudad sang COVID-19 vaccine, nagakadapat nga may ideya ang tanan may kaangtanan diri.
Nahibaluan nga nagpirma na sang kasugtanan si Mayor Jerry Treñas para sa 600,000 doses sang bakuna sang AstraZeneca.
Ang nasambit nga doses ang bastante para sa 300,000 ka tawo sa syudad ukon 60% sa populasyon sang Iloilo City.
