ILOILO CITY – Nagpain sang pondo ang Iloilo City Government para sa libre nga cremation sa mga pumuluyo nga indi magpabakuna sa COVID-19.
Sa interview sang Bombo Radyo kay Mr. Jeck Conlu, spokesperson sang COVID-19 team sang Iloilo City Government, iya ginpahayag nga hugot sa gihapon nga ginpaathag sang gobyerno nga wala sang pilitay ang pagpa-inject sang COVID-19 sa tion nga mag-abot na ini.
Apang suno kay Conlu, may yara sang ginpain nga pondo para sa cremation si Iloilo City Mayor Jerry Treñas sa mga tawo nga indi magpabakuna kag mabawian sang kabuhi bangud sa COVID-19.
“Waay ni ya pilitay, but ofcourse, may mga worse scenario man kita nga ginatan-aw.. amo na gani ang hambal ni Mayor Jerry Treñas, nagpreparar man gyapon pondo ya ang aton syudad para sa budget naton for cremation para sa mga worse scenario nga pwede matabo kay indi man tanan gusto magpa-vaccine kag indi naton mapaktan ang epekto sang COVID,” pahayag ni Conlu.
Dugang pa sang natungdan, ginahitso na subong sang gobyerno ang mga tikang kag plano nga himuon sa tion nga yara na ang nasambit nga bakuna sa syudad sang Iloilo.
