Natigayon na nga madakpan sang otoridad ang isa ka anay pulis nga masobra isa ka dekada nga naghalin sa serbisyo kag nagpanago bangud sa nakomiter nga pagpanghimulos sa iya kabulig sa balay.
Ang suspek amo si Leonaldo Soberano, 58.
Ang biktima naman amo si alyas “Joy”, residente sang Balasan, Iloilo, kag naga-edad 18 anyos sang umpisa nga ginhimuslan sang suspek.
Nagpanago si Soberano sa Luzon kag nadakop sang damlag lang sa iya bag-o nga lugar sa Barangay San Agustin, San Fernando City, Pampanga.
Subject sa Warrant of Arrest si Soberano sa kaso nga rape kag Attempted Homicide nga ginpasaka sang Regional Trial Court Branch 26 sang Iloilo City kag MCTC Iloilo City.
Ang mga operatiba sang Anti-Kidnapping Group – Visayas Field Unit ang nagtrack kay Soberano tubtob madakop ini sa iya lugar nga ginapanaguan sa Pampanga.
Nakumpiska man kay Soberano ang isa ka .45 caliber pistol kag isa ka airsoft electric gun.
Nagpadayon sa pag-AWOL ukon (absent without leave) si Soberano sa trabaho bila pulis umpisa sang tuig 2010 sa diin nagpaggwa ang korte sang Warrant of Arrest sa pagpanghimulos sa biktima nga si alyas Joy.
Natalana nga ibalik ang suspek sa Iloilo para sa disposisyon sang korte sa iya nga kaso.
