Patigayunon na subong nga adlaw, Enero 15, ang Pamukaw sa Virtual Opening Salvo sang Digital Dinagyang 2021.
Sa interview sang Bombo Radyo kay Mayor Jerry Treñas, iya ginpahayag nga las 5:00 tubtob las 7:00 sang gab-i pagahiwaton ang nasambit nga aktibidad.
Gin-athag ni Treñas nga mahimo malantaw kag mabatian ini sa tanan nga media outlets lakip na sa social media kag sa iya nga personal nga facebook account.
Suno kay Treñas, ginpasigurado sang Iloilo Festivals Foundation Incorporated (IFFI) nga pagasundon ang tanan nga mga health protocol sa mga kahiwatan sa Digital Dinagyang 2021.
Ginpahayag man sang alkalde nga ang Iloilo City lamang ang nakapatigayon sang festival apisar nga may COVID-19 pandemic.
“It is only Iloilo City ang nakapatigayon sang aton nga festival..ang Kalibo nag-untat, ang Cebu ginpa-untat, ang sa Manila sa Tondo
ginpauntat man, pero diri sa aton ya nagsigi kita nga digital lang ang aton Dinagyang para indi mahambal nga bangud sa sa aton pagselbrar, nagdamo pagid ang kaso naton,” pahayag Treñas.
Apisar nga layo sa patag suno kay Treñas ang pagselebrar sang Dinagyang sa subong nga tuig, nalipay siya bangud wala sang may nakapugong sini.
Ginpahayag man sang natungdan nga mas madamo ang makalantaw sang Digital Dinagyang 2021 lakip na ang mga Ilonggo nga yara sa iban nga pungsod bangud virtual na ang tanan.
Agud nga mabuhinan ang kahidlaw sa syudad sang Iloilo, gin-agda man sang alkalde ang mga Overseas Filipino Workers (OFWs) nga magbuylog kag maglantaw sang mga kahiwatan sa Digital Dinagyang 2021 pinaagi sa social media.
