Indi makapugong ang mga pagpanghangkat nga dala sang COVID-19 pandemic sa patigayunon nga Dinagyang Digital 2021.
Tema sang selebrasyon ang “One Dinagyang, One Iloilo, Halad kay Senor Sto. Niño”.
Sa interview sang Bombo Radyo kay Atty. Jobert Peñaflorida, Presidente sang Iloilo Festivals Foundation Inc. (IFFI), iya ginpahayag nga makabig nga modelo ang syudad sang Iloilo sa pagpanguna sang digital nga selebrasyon.
Diri man makit-an suno kay Peñaflorida ang paghugpong sang mga Ilonggo sa tunga sang ginapangatubang nga pagpanghangkat dala sang COVID-19 pandemic.
Suno kay Peñaflorida, sa Enero 24, Dominggo nga adlaw, patigayunon ang highlight sang ‘One Dinagyang’ presentation.
Maga-umpisa ini las 7:00 sang aga tubtub las 10:00 sang aga.
Ginpahayag ni Peñaflorida, nga masaksihan naman sa liwat ang abilidad sang tagsa ka Ilonggo bilang paghatag sang kadungganan kay Sr. Sto. Niño.
“Gin-isa isa, ginbato-bato namon ano lang ang pwede, anong indi pwede, and the reality is, the only way to do it is to embrace the new normal, paagi sa social media,” pahayag ni Peñaflorida.
Pinasahi ini suno kay Peñaflorida bangud 30 lamang ka warriors ang kaundan sang isa ka tribo nga magatiglawas sa pito ka mga distrito sa syudad sang Iloilo.
Ini amo ang Iloilo City Proper, La Paz, Iloilo City, Jaro, Iloilo City, Mandurriao, Iloilo City, Molo, Iloilo City, Villa Arevalo, Iloilo City kag Lapuz, Iloilo City.
Apisar nga wala lamang sang igadeklara nga champion, magahatag sa gihapon sang token kag awards ang IFFI.
Samtang, subong na man nga adlaw patigayunon ang Pamukaw sa Virtual Opening Salvo sang Digital Dinagyang 2021, las 5:00 tubtob las 7:00 sa gab-i.
Katuyuan sini suno kay Peñaflorida nga mapukaw ang balatyagon sang mga ilonggo nga nagapadayon sa tunga sang COVID-19 pandemic.
I-presentar man sa virtual Opening Salvo ang documentaries sang mga tribu nga nagpasakop sa Dinagyang Festival sang 2020.
Magluwas diri, may ara man sang short program nga hiwaton sa Iloilo City Hall bilang panugod sang selebrasyon sa syudad sang Iloilo subong nga tuig.
Yari naman ang balantayan nga religious activities subong nga semana:
Enero 15 tubtob 23 – Novena Days
Enero 15 (4:30 sa hapon) – Installation of Hermana and Hermano Mayor 2021
Enero 16 (4:30 sa hapon) – Reenactment sang baptism ni Queen Juana
Enero 17 (4:30 sa hapon) – Coronation and Installation of Niño Ambassador
Enero 21 (4:30 sa hapon) – Floral Offering kag misa para kay the late Reverend Father Ambrosio Galindeza, O.S.A, ang ginakilala nga Father of Dinagyang
Enero 22 (2:00 sa hapon) – Motorcade ni Senyor Santo Niño
Enero 23 (6:00 sa gab-i) – Virtual Religious Sadsad
Enero 24 (4:30 sa aga) – Concelebrated High Mass
Enero 25 (4:30 sa hapon) – Thanksgiving Mass
Sa mga misa nga patigayunon, ginasigurado man sang IFFI nga masunod ang tanan nga health protocols batok sa COVID-19.
Nagpang-agda man si Peñaflorida sa bug-os nga Western Visayas nga bantayan kag buylogan ang tanan nga kahiwatan sa Digital Dinagyang 2021.
Para sa indi makatambong sa live mass, mahimo magtutok sa Bombo Radyo Iloilo, sa Facebook Live, kag sa www.bomboradyo.com, ang official website sang Bombo Radyo Philippines, ang Pambansang Radyo ng Pilipinas.
Ini na ang ika-53 nga tuig nga ginaselebrar ang Dinagyang Festival.
Bantayan naman sa Bombo Radyo ang mga updates sa Digital Dinagyang 2021.
