Nagtaas sang 1,400% ang kaso sang leptospirosis sa probinsya sang Iloilo sang tuig 2020 ipanggid sang 2019.
Sa interview sang Bombo Radyo kay Dr. Maria Socorro Quiñon, acting chief sang Provincial Health Office, iya ginpahayag nga sang 2019, tatlo lang ang kaso sang leptospirosis nga narekord apang sang 2020, naglab-ot ini sa 45.
Suno kay Quiñon, tatlo ang mga napatay bangud sa leptosprosis sang 2020 sa diin halin ini sa Miagao, Estancia kag Calinog.
Ang banwa sang Balasan amo ang may pinakamadamo nga kaso sa diin may yara ini sang walo.
Ginasundan ini sang;
-Lambunao kag Banate nga may apat ka kaso
-Carles, San Enrique kag Passi City nga may tag tatlo ka kaso
-Tubungan kag Guimbal nga may tag duha ka kaso
-Miagao kag Estancia nga may tag duha man kaso
Panugyan ni Dr. Quiñon, kun may yara sang pilas kag ginlubog ini sa baha, mas maayo nga magpadulong sa sentro kag magpangayo sang libre nga bulong.
*DENGUE*
Sa pihak nga bahin, sa kaso naman sang Dengue, 97% ang pagnubo sang tuig 2020 ipanggid sang 2019.
Humalin Enero 1 tubtob Disyembre 31, 2020, naglab-ot sa 694 ang kabug-usan nga kaso sang dengue kag duha ang patay samtang sang 2019,,, 22,132 gid ang kaso kag 78 naman ang patay.
Sang 2020, ang mga kabanwahanan nga nakarekord sang madamo nga kaso sang dengue amo ang masunod;
-Estancia
-Carles
-Balasan
-Sara
-Ajuy
-Batad
-San Dionisio
-Calinog
-Oton kag;
-Dumangas
Suno kay Quiñon, kadam-an sa mga pasyente sadto nga infected sang dengue amo ang mga kabataan naga edad isa tubtob 10 ka tuig.
Dugang pa sang natungdan, lauman nga sa 2022 liwat nga magaduging ang nasambit nga balatian bangud nagataas ang kaso kada tatlo ka tuig.
