China magadonate sang 500,000 doses sang COVID-19 vaccines sa Pilipinas

Gin-anunsyar sang Department of Foreign Affairs nga plano sang China nga magdonate sang 500,000 doses sang COVID-19 vaccines sa Pilipinas.

Suno sa ahensya, ginpahibalo mismo ni Chinese State Councilor and Foreign Minister Wang Yi si Foreign Affairs Secretary Teodoro Locsin Jr. sang iya nga plano kadungan sang iya duha ka adlaw nga official visit sa pungsod.

Wala na gindetalye pa ni Wang kun ano nga manufacturer sang bakuna ang ihatag sang China ukon ang timetable sa pag-abot sini sa pungsod.

Nahibaluan nga ang Sinopharm COVID-19 vaccine sang China ang may 79.84 percent nga ka-epektibo, ang Sinovac vaccine sa Brazil trial ang may 60 percent nga ka-epektibo samtang 91 percent naman ini sa Turkey.

Ginpahayag naman ni vaccine czar Carlito Galvez Jr. nga nagtanyag sang “best price” ang Sinovac kag nagpanawagan man ini sa publiko nga indi paghikayan ukon i-discriminate ang nasambit nga vaccine batuk sa iban nga mga bakuna.